Kenen kans sie kahvisti juot
Ja kenen kans et milhän ekkä mishään taphauksessa juo.
Mullon mielessä ihmiset, joitten kans mullon yhteistyö vähentyny tai loppunu, ainaki tältä hetkeltä ja tykkään, ettemmä oiken tulheet toihmeen keskenämme, puolin tai toisin.
Omalta kohaltani hahmotan selvästi, että näen heissä jokhaisessa samoja ominaislaatujako näen ittessäki.
Naurattaako huomaan iloittevani kaikista piirtheistä, jokka löyän heistä ja ittestä, vaikkei net niin hauskoja tai ylpeyen aihheita ookhaan.
Ehkä non piirheitä, jokka ehkä löysin just heän kautta, ehkä vain heän ansiosta ja mie piän, että kaikkia piirheitä met tarttema, niitten käyttö vain on taitolaji.
Mie koen ihanaa hillitöntä tasa-arvoa ihmisten kans ja tykkään kaikista, mutta kaikkien kans minusta ei oo tekheen kahvikuppia lähempää tai enempää yhteistyötä eli kahvit voin jua kenen kans vain.
Lopuksi kiitos ja voih, kuinka kiitollinen oonkhaan kaikista kohtaamisista, oon tarvinu kaikkia ja kaikkea oon tarvinu ja kaikissa on ollu hohtoa ja kultareunus jossaki mielessä tai kohassa.
Ja se, mikä on ollu vaikeaa, son antanu vahvuutta tai vaikka avanu minun pikkusia pösilön silmiä.
Kukkikhoon kaikki kukat, tämoli tämmönen halki poikki pinhoon -kuutiointi, että pois tieltä lumikolat ja pakkasherrat enkä oo itte yhthään parempi ihminen, en sitä oo sanomassa, ei toinen parempi toista.
Kaikki mennee oiken ja kaikki hyvin ihan jumalallisessa tapahtumien kulun järjestyksessä, pus pus ystävät tai vaikkettä oiskhaan!
taidelaronia 