Month: maaliskuu 2022

Silirimpsis

Silirimpsis

Ei kukhan usko utopioihin
eikä haavemaailhmoihin,
hä, emmähän met höntitä
itteä eikä toisia.

Entäs mistä net
lohkot ja lahkot tullee,
pontit ja puolet ja kantit,
kostot ja katkerat taistot.

Silirimpsis ja sileä tie
ja elämäson kärsimystä
ja kenen on syy,
pelot ja vihat yks myy,
toinen sitte ostaa,
ymmärtää elämää joskus
vaikeaa ja sekavaa on,
sannoo hän,
ja elämä koko ajan puhhuu
meän omala suulla,
kattoo meän silmilä,
tekkee meän käsilä
ja koko ajan todistaa
meän vaphautta
olla oma ittemmä.

Kirjotan kirjaa #älänujerru
https://www.laronia.com #saajakaa

En ota ittää enkä länttä

En ota ittää enkä länttä

En usko mithän,
uutiset ohi passaa,
en näytä passia
enkä käytä tassia
ja koko ihmiskunta on
ihmeellisempiko kumpi
ja järkevämpikö kampi,
eikä kukhan kaikkea tiä,
Jumala voiton vie.

Elämä puhhuu ja pulputtaa
joka nurkasta,
ei auta kethän sitteerata
eikä analyysiä murjasta,
vaan kiittää matkasta,
kattoa avarasti,
aatella joustavasti,
tuntea syvästi,
ja likelä on se,
mikä tehä pittää
eikä itteä sais pettää.

Kirjotan kirjaa #älänujerru
https://www.laronia.com #saajakaa

Lutviutumisaika

Lutviutumisaika

Jos joku asia tai ilmiö
tuntuu vaikealta,
henggitä ja elä sen kans,
pane sille huppu päähän,
ota viehreen ja unoha siihen.
Ongelmia ja draamoja
täälä riittää,
kato toishaale,
anna otheen kimmota,
ja mene muile maile.

Ja uuesti tavatessa,
siinonki viisas tuttava,
joka onki yhtäkö vastaus.
Tai taas kerran kohatessa,
sonki selvää pässinlihhaa,
syö ja niele eikä ongelmia.
Tai törmäillessä,
se lutviutuu niinko
saippua lämpihmään vetheen.
Tai vuosien päästä
muistit sen ja nostit huppua
ja sieloli enkeli,
jonka aika onki just nyt.

Kirjotan kirjaa #älänujerru
https://www.laronia.com #saajakaa

Palvelija hakusessa

Palvelija hakusessa

Jos kerta Jumala ei solmi
kenggännauhoja mulle,
niin rehti ja pettämätön
palvelija ois hakusessa.

Ei omia ideoita,
ei pöllöilyjä,
ois niinko ajatus
tai orja, melkein vanki,
tottelevainen ja viisas,
kiltti niinko pikkupiltti.

No eipä taijja löytyä,
häätyy nöyrtyä itte,
sitoa omat nauhat
ja heiluttaa kauhat
ja pittää huoli,
etten petä
enkä petkuta.

Kirjotan kirjaa #älänujerru
https://www.laronia.com #saajakaa

Siunattua lentoa

Siunattua lentoa

Varo, mitä haluat,
ko sitä sie saat,
sitä mitä met tilattiin,
sitä saattiin.
On vallotettu
maita ja syämmiä
ja sitte pesty pyykkiä.
Yltiötarkkoja ajankuvia
ei oo eikä tuu,
tunnustuksia riittää.
Aallokossa lentelystä
voi seurata, että tehhään
mahottomasta mahollista.
Tasapaino ei tule
samoja klikkaamalla.
Kylmäverisesti enämpi
ja laajasti ja syvästi,
piä silmät auki,
ota kiini ja päästä irti.
Tämä on se eläminen,
joka meile annettiin
ja met ja toellisuuessa
koko ihmiskunta on
ja on aina ollu
vaphaassa puotuksessa.
Nauti ja lennä.
Siuhnausta.

Kirjotan kirjaa #älänujerru
https://www.laronia.com #saajakaa

Tule rakhaus-kakku

Tule rakhaus-kakku

Kukhan ihminen
täälä maailmassa
ei tiä mitä
millonki tapahtuu
ja mihin menhään.

Ei kukhan tiä,
eikä oo koskhan tienykkään
ja met vaan leivoma,
älä tule pelko-kakku,
tule rakhaus-kakku.

Keskitymä omhaan olhoon,
omhiin lähheissiin,
ihahnaan omhaan kuplaan,
hoijjama ja turvaama sitä
kaikella sillä,
mikä meile on mahollista.

Keskitymä tärkeimppään
ja annama muun olla.

Kirjotan kirjaa #älänujerru
https://www.laronia.com #saajakaa

Tahallinen tavallisuus

Tahallinen tavallisuus

Tahallinen tai viaton
empi hetken
ja nosti kätensä,
ko se muisti,
etton toeksi toettu,
että met tavaliset
kunnon ihmiset,
olhan vaaraksi
maailmanrauhalle.

Uhraan ihmisen,
ittessäni ja toisissa,
ko hättäilen hulluna
asioitten, käsitteitten
ja mielipitheitten
mukhan ja tahthiin,
laukon niinko lumottu
pillipiiparien pillien
perässä mihin sattuu.

Kirjotan kirjaa #älänujerru
https://www.laronia.com #saajakaa

Elämänhakuopas

Elämänhakuopas

Ystävä tuli kylhään,
istahti pöyän laijjale
ja alotti, kuule,
yks elämänhakuopas sano,
että pitäs pittää ittestä
huolta niinko kotielläimestä.

Juoksuttaa ulkona,
syöttää parasta ruokaa,
antaa nukkua rauhassa,
ei syytellä eikä nälviä,
suojella kaikelta pahalta.

Auttaa ja tukea ja helliä,
kehua kovasti ossaamisista,
viissauesta ja miehleisyyestä,
erityisestä ainutkertasuuesta,
urhheuesta ja ihanuuesta,
siis niinko soisit puudeli,
jollei muita huoltajia oo,
ko sie itte, olla hyä ittele.

Luit muuten oiken,
elämänhakuopas,
niin se sano.

Kirjotan kirjaa #älänujerru
https://www.laronia.com #saajakaa

Pelossa

Pelossa

Häin tuskin uskallan hengittää,
en voi enkä tohi aatella,
en jaksa ajatuksia lophuun,
silmät ja korvat kiini.

Kirjotan pelot sanoiksi,
vihkhoon,
pelot jonhoon,
halki, poikki, pinhoon,
rivi riviltä,
mustien kansien välhiin,
se helpottaa
ja pikku syän saa levähtää
ja sielu henggähtää.

Pahimmat pelot ei taivu,
nei mahu sanoihin,
merkkaannet aihheen mukhaan,
soperran jotaki rasteja,
seki toimii
ja sitte joskus aikahnaan,
katon huvikseni,
moniko pelko totteutu.
Ei ehkä monikkaan,
elämä kulkiki omia latuja.

Kirjotan kirjaa #älänujerru
https://www.laronia.com #saajakaa