Month: marraskuu 2023

Pyyhin pöytää

Pyyhin pöytää

Kuinka ihminen voikhan
ikävöijjä kotia,
kaivata toista ihmistä,
toivoa jotaki jota
vasten nojata,
vähän levähtää.

Yhtenä päivänä
mie pyyhin pöytää,
istahan toolile
ja nojjaan käshiin,
annan tuntheen tulla.

Annan itteni kokea
sitä pahinta tunnetta,
en anna ajatusten viä,
pallaan tuntheesseen,
hengitän sen kans
en hoputa enkä haasta,
vain tunnen sitä ittessä,
tunnistan sen energiaa.

Tunne kasvaa,
itken sitä,
piän siittä kiinni,
olen hiljaa, tunne on,
löysään hellästi,
jätän siihen,
mie nousen ylös
ja pyyhin pöyän.

Kirjotan kirjaa Älä nujerru https://www.laronia.com/

Uhrilamphaat

Uhrilamphaat

Uhriutumisen mestarit,
kiltteyestä kipeät,
teeskentellee
ja tärkeilee,
kiillottaa kilpeä,
pissaa omhaan silhmään,
sorkkii ja sorsii
itteä ja muita
ja rinnassa syän
koko ajan tietää,
sinua ei korvaa mikhän.

Kirjotan kirjaa Älä nujerru https://www.laronia.com/

Esikunta arestissa röskytä rös

Esivalta arestissa röskytä rös

Rump rump rellaa,
reka reka rellaa,
tothuutta rällää,
rauhaa rillaa,
rakhautta riittää
ja vastoinpäin
ja päinvastoin,
ahnestippa kallista röörää,
röskytä rös.

Jatkuppa tottuus-sekarlo,
se myöthän käy,
se myöthän käy,
esivalta arestissa,
röskytä rös.

Rump rump rellaa,
reka reka rellaa,
ikiaikaisesta
ikiaikasheen
jatkuppa tottuus-sekarlo,
se myöthän käy,
röskytä rös.

Kirjotan kirjaa Älä nujerru https://www.laronia.com/

Reilun pelin voima

Reilun pelin voima

Tothuus on täällä tänhäänki
ja aina ja kaikkialla
ja koko ajan näkösällä
ja met tunnistama
sen ittessämme.

Emmäkä met tanssi niinko
maailma meile rummuttaa,
vaan tanssaama oman
tothuuen tahthiin.

Mitä enämpi kulen
oman tothuuen kans,
sen reilumpi peli,
rennompi ote,
selkeämpi pää
ja parempi mieli.

Kirjotan kirjaa Älä nujerru https://www.laronia.com/

Törmäys

Törmäys

Eppäs tiiä, minkä löysin,
löysin pienen vellinkisen,
eppäs tiiä, mitä sattu,
yhtenä iltana kaupasta tulon jälkhen,
ennen pyykkikonheen tyhjäystä,
kiihreessä kiihreesti itte
itteni sekopääksi
sumuttanheena ja eksynheenä
törmäsin päistikkaa itheeni.

Kirjotan kirjaa Älä nujerru https://www.laronia.com/