Hilkkapien ennen ja nyt

kotimökki (2)

 

Hilkkapieni pikkusen kotimökin eessä,
siinä pottupellon laijjalla hyvässä olossa,
käen ulottuvilla kaikki rakas ja hyvä.

Leikki luistaa,
aurinko paistaa,
on lempeän valosaa,
on kesäpäivä,
on lämmintä,
tuuli suhisee puissa.

Joella räplättää vene jossain kaukana,
välilä juna mennä kolkuttaa mettän takana,
en kaipaa mithään,
en oota enkä toivo mithään,
minua ei janota,
ei ole nälkä,
elämässäni eijjole mittään korjattavvaa.

Tiän, että minua hoijjettaan,
minua autettaan,
mulla on kavereita, jos niin tahon,
tiän, ettei minun tartte huolehtia mistään,
voin luottaa,
kaikkea elämässäni tullee ja mennee sopivasti.

Tuttuja ääniä ja tuoksuja,
on kodikasta,
maa on lähellä,
mettä
ja taivas,
lintu lentää korkealla.

Olen kotona jossaki
oikeassa paikassa
oikeassa seurassa
just nyt.

– Hilkka Laronia

Advertisements